قصيدة رثاء إلى روح القلب ونبضه والدي أحمد خير خليفة رحمه الله – علي أحمد خير خليفة

فلسطينيو العراق4

عدد القراء 3106

http://www.paliraq.com/images/001pal/000PI-kh.png

 

أبوي إنته وغلاتي وأفتخر بيـــــــــــــك

أدعيلك برحمة ومغفرة وإحســـــان

كلت اجمل قصيدة اليوم اهديـــــــــــــك

أمدحك وأصيرن الك اني كلي لسان

قبل قصّرت أني كلشي ما منطيـــــــــك

وأقدملك اليوم بكل فخر إنســــــــان

إنسان بمحبة وبوفا يحس بيــــــــــــــك

يا أطول نفس يستنشكة الغركـــــان

يا أعظم أبو محّد يوازيــــــــــــــــــــك

ثمن يمك تصفّر كل الاثمـــــــــــان

وإذا ترجعلي ساعة وأنتعش بيـــــــــك

على أجتافي أفرفر بيك الاوطـــــان

ومن نفسي الخبيثة بدرع أحميــــــــــك

واضل واكف بابك حارس السلطان

وعلى تربيتك النا شلون أجازيــــــــــك

بس على هاي ألبسك الف نيشــــان

يا كلبي تصبّر جيت أواسيــــــــــــــــك

وأواسي ابن عمي الشهم عدنــــــان

برج إنته بعسل وبمسك أبنيــــــــــــــك

وأزيّن هالبرج باللولو والمرجـــــان

بحر إنته يغالي شلون اعدّيـــــــــــــــك

ويلبيك إنته حارت دفة السفّــــــــان

لغز إنته وناسك تيّهت بيــــــــــــــــــك

وبيك يحير حتى النابغة الذبيـــــــان

عزيز وغير ربك من يمشّيــــــــــــــك

ما تنذل ،صرح من غير عِـــــمدان

قصيدة وصف وحده شلون تكفيــــــــك

كل ساعة وجب أكتب الك ديــــوان

وبغربال احطك كل ساعة أصفّيــــــــك

يا صفو الذهب يا جفة الميــــــــزان

وفي وطيب مرح من يومي أدريــــــك

عجب هالمرح هذا اليوم خلصـــــان

قليلة شما وصفتك ضاع الوصف بيــك

يا أطيب قلب يا نكهة الرمـــــــــــان

بكد هاي الارض مهموم وابجيـــــــــك

وعلى كل لحظة فاتت والله ندمــــان

بس كول مسامحك يا والدي شبيــــــك

غلطت انه وكلت يا بوي غلطــــــان

وصيتك عندي وما كتلي أوصّيــــــــك

وصيتك بالكلب وبهدب الاجفـــــــان

حرت وبيا كتر تاج واخلّيـــــــــــــــك

إذا بكل كتر بيها الك عنــــــــــــوان

ما شفت العوج من يومه مخطيـــــــك

وما بينك وبين العوج شتـــــــــــــان

كل ناسك تحبك كلها تزكّيـــــــــــــــك

محبة الناس هيّ محبة الرحمـــــــن

أرتحت بوية الوضع جر عكس بعديك

إذا حتى الطيور طلعت الها اسنـــان

ولا حتى الصديق الجان يوفيــــــــــك

بس جوه القصص نسمع الخــــــلان

 من كلبي اخط الشعر أرثيـــــــــــــك

يا شمعة الديرة وهيبة الديــــــــــوان


الدعاء لوالدي ولاموات المسلمين

 

ملاحظة : جزءا من الوفاء لأخي الغالي وابن عمي عدنان سعيد خليفة ( ابو محمد ) سأبعث قصيدة له من ارشيفي  قريبا إن شاء الله

 

علي أحمد خير خليفة

أبو إسلام

15/10/2011

 

المقال لا يعبر بالضرورة عن رأي الموقع

"حقوق النشر محفوظة لموقع " فلسطينيو العراق" ويسمح بإعادة النشر بشرط ذكر المصدر"

 

الكلمات الوصفية

اترك تعليقك

التعليقات 4

  • السويد

    0

    شكرا جزيلا اخواني الافاضل لهذه المشاعر الانسانية الرائعة فتحية للاخ الفاضل عدنان السلبود والشاعر المتألق عادل العمرو وابن الخال الغالي طه المحسن ورحم الله امواتكم وامدكم بالعمر المديد

  • السويد

    0

    اللهم اغفر له وارحمه برحمتك الواسعة وارحم اموات المسلمين اجمعين بارك الله بيك علي الوردة والله انت ماكو منك اثنين وعاش لسانك

  • قبرص

    0

    اللهم اغفر له وارحمه واجعل مثواه الجنة ان شاء الله وبارك الله بك على الوفاء والاحسان

  • سوريا

    0

    اللهم ياحنان يامنان ياواسع الغفران اغفرله وارحمه وعافه واعف عنه واكرم نزله ووسع مدخله واغسله بالماء والثلج والبرد ونقه من الذنوب والخطايا كما ينقى الثوب الابيض من الدنس اللهم اغفر لجميع موتى المسلمين الذين شهدوا بانك الاله الحق وان محمدا عبدك ورسولك وماتو اعلى ذلك

شارك برأيك

الاسم
الدولة
التعليق




A- A A+