دارمي عراقي- عبد القادر الزيناتي

فلسطينيو العراق2

عدد القراء 3937

السلام على الجميع .. اخوة واخوات .. وكل عام وانتم بخير

رمضان شهر الخير ويمر على سلام
لله دعاء وصوم وبيه احله ايام
--------------------
رمضان اجه وراح بخير وسلامه
ننتظر جيته النوب وينوّلنه صيامه
--------------------------
اعبد وصّلي اليوم باجر تره حساب
تكفيك شر النار وباليمنه الكتاب
---------------------------
المن اقول اليوم ايامك سعيده
كلها رطن اجناب ويقرا جريده
يا هو الأصبح أعليه ويا هو الاصافح
كلهم عجم يا صاح وبيهم اناطح
بالغربه اون ونات واختمها بسكوت
رغم الحلاة اشكال احس قلبي ديموت
اتنطرك يا صاح بطيف وتجيني
وارجع اعيش وياك وتناظرك عيني
شفت الاعياد اشكال واعياد المخيم
ما بي فرح بس حب ومنه أتعّلم
دلاّلي بقه هناك بارض المخيم
بالغربه نحلت يا صاح وهم عقلي جيّم
والله الخلق هالكون روحك تره وياي
مشتهي التمر البيك ومهيّل الجاي
احلى صباح اليوم من اسمعت صوتك
روحي تيهم وياك ما ترضى تعوفك
المن اقول اليوم عيدك امبارك
وانت ابعدت يا خوي وخليانه دارك
من فارقت الاحباب دمعي فلا جف
لغيرك ما تربه عيون وقلبي فلا رّف
خّل تفرح الشمات مو فرّكونه
كلمن فرح بينا خّل ترمد عيونه

من دمع عيني مو حبر ابعث الك مرسال
الحبر يكذب لو كتب يشكيلك الحال
يا عيد اشوفه النوب واتصافح وياه
خلوني بس بالصور اتقابل وياه
شماتي موش مات شماتي بلوه
بحزني انا يفرحون وقلبي اتجوّه


عبد القادر الزيناتي

19/8/2012

 

المقال لا يعبر بالضرورة عن رأي الموقع

"حقوق النشر محفوظة لموقع " فلسطينيو العراق" ويسمح بإعادة النشر بشرط ذكر المصدر"

الكلمات الوصفية عبد القادر الزيناتي

اترك تعليقك

التعليقات 2

  • احسنت وبارك الله فيك وهل من مزيد اذا امكن

  • تحية لك عمي الفاضل الكاتب: عبد القادر الزيناتي ... أحسنت وأبدعت ,, فلقد كنت موفقاً في ماكتبت ,, فأنت تجيد الكتابة باللهجة العراقية الصعبة ,, بارك الله بك .

شارك برأيك

الاسم
الدولة
التعليق




A- A A+